రామ భక్తికి నిలువెత్తు నిదర్శనం ఆంజనేయేడు. అట్టి అంజనేయ స్వామి సౌర్య పరాక్రమాలను, అజేయమైన బలాన్ని, భక్తిని, గుణ గణాలనూ కీర్తిస్తూ సాగే ప్రార్ధనే ఆంజనేయ దండకం.
భక్తుల భయాలను పోగొట్టి అభయాన్ని ఇచ్చే ఈ ఆంజనేయ దండకం అర్ధవంతంగా పారాయణ చేయటం ఎంతో శుభప్రదం. శారీరక ఆరోగ్యాన్ని, ధైర్య స్థైర్యాలను వృద్ధి చేస్తుంది ఈ పారాయణ. అంతేకాక ప్రేత, పిశాచ బాధల నుండి విముక్తినిచ్చి శాంతిని, కీర్తిని ప్రసాదిస్తుంది.
మహా మహిమాన్వితమైన ఆంజనేయ దండకం లేక హనుమాన్ దండకం ఎల్లపుడు పఠించతగ్గ దైవ ప్రార్ధన. భక్తులలో హనుమద్భక్తిని పెంచుతుంది.
![Anjaneya dandakam in telugu - Lord Hanuman dandakam](https://stotramanjari.com/wp-content/uploads/2023/01/Anjaneya-dandakam.jpg)
Sri Anjaneya Dandakam in Telugu- ఆంజనేయ దండకం (తెలుగు)
శ్రీ ఆంజనేయం ప్రసన్నాంజనేయం
ప్రభాదివ్యకాయం ప్రకీర్తిప్రదాయం
భజే వాయుపుత్రం భజే వాలగాత్రం
భజే హం పవిత్రం భజే సూర్యమిత్రం
భజే రుద్రరూపం భజే బ్రహ్మతేజం
బటంచున్ ప్రభాతంబు సాయంత్రంబు నీ నామ సంకీర్తనల్ చేసి
నీ రూపు వర్ణించి, నీ మీదనే దండకం బొక్కటింజేయ నూహించి,
నీ మూర్తినిన్ గాంచి, నీ సుందరం బెంచి,
నీ దాస దాసుండనై, రామ భక్తుండనై,
నిన్ను నే గొల్చెదన్,
నీ కటాక్షంబునన్ జూచితే, వేడుకల్ జేసితే,
నా మొరాలించితే, నన్ను రక్షించితే,
అంజనాదేవి గర్భాన్వయా దేవ
నిన్నెంచ నేనెంత వాడన్
దయాశాలివై చూచితే, దాతవై బ్రోచితే, దగ్గరన్ నిలిచితే,
తొల్లి సుగ్రీవునకున్ మంత్రివై స్వామి కార్యార్థవై యుండి, శ్రీరామసౌమిత్రులం జూచి,
వారిన్ విచారించి, సర్వేశు పూజించి, యబ్బానుజున్ బంటుగావించి,
యవ్వాలినిన్ జంపి, కాకుత్స్థతిలకున్ దయా దృష్ఠి వీక్షించి,
కిష్కిందకేతెంచి, శ్రీరామ కార్యార్థమై, లంకకేతెంచియున్, లంకిణింజంపియున్, లంకనున్ గాల్చియున్, భూమిజన్ జూచి, యానందముప్పొంగ, యాయుంగరంబిచ్చి, యారత్నమున్ దెచ్చి, శ్రీరాముకున్నిచ్చి, సంతోషనున్ జేసి,
సుగ్రీవునుం అంగదున్ జాంబవంతాది నీలాదులున్ గూడి,
యాసేతువున్ దాటి, వానరుల్ మూకలై, దైత్యులన్ ద్రుంచగా,
రావణుడంత కాలాగ్ని ఉగ్రుండుడై, కోరి, బ్రహ్మాండమైనట్టి యాశక్తినిన్ వేసి,
యా లక్ష్మణున్ మూర్ఛనొందింపగ
నప్పుడేపోయి సంజీవనిన్ దెచ్చి,
సౌమిత్రికిన్నిచ్చి ప్రాణంబు రక్షింపగా, కుంభకర్ణాది వీరాదితో పోరాడి,
చెండాడి, శ్రీరామబాణాగ్ని వారందరిన్ రావణున్ జంపగా నంత లోకంబులానంద మైయుండనవ్వేళనన్,
నవ్విభీషణున్ వేడుకన్ దోడుకన్ వచ్చి, పట్టాభిషేకంబు చేయించి,
సీతామహాదేవినిన్ దెచ్చి, శ్రీరాముకున్ ఇచ్చి,
అయోద్యకున్ వచ్చి, పట్టాభిషేకంబు సంరంభమైయున్న
నీకన్ననాకెవ్వరున్ గూర్మిలేరంచు మన్నించినన్
రామభక్తి ప్రశస్థంబుగా నిన్ను నీనామసంకీర్తనల్ చేసితే
పాపముల్ బాయునే భయములున్ దీరునే
భాగ్యముల్ గల్గునే సకలసామ్రాజ్యముల్ సకలసంపత్తులున్ గల్గునే
వానరాకార, యోభక్తమందార, యోపుణ్యసంచార, యోధీర, యోశూర
నీవే సమస్తంబు నీవే మహాఫలంబుగా వెలసి యాతారకబ్రహ్మ మంత్రంబు పఠియించుచున్ స్థిరముగా వజ్రదేహంబునున్ దాల్చి,
శ్రీరామ శ్రీరామ యంచున్ మనఃపూతమై యెప్పుడున్ తప్పకన్ తలచు
నాజిహ్వయందుండి నీదీర్ఘదేహంబు త్రైలోక్యసంచారివై,
శ్రీరామ నామాంకితధ్యానివై బ్రహ్మవై, బ్రహ్మ తేజంబంటచున్ రౌద్ర నీ జ్వాల కల్లోల హావీర హనుమంత!
ఓంకారహ్రీంకార శబ్దంబులన్ భూతప్రేతపిశాచంబులన్,
గాలి దయ్యంబులన్, నీదు వాలంబునన్ జుట్టి నేలంబడంగొట్టి
నీముష్టిఘాతంబులన్ బాహుదండంబులన్ రోమఖండంబులన్ ద్రుంచి, కాలాగ్ని రుద్రుండవై
బ్రహ్మప్రభా భాసితంబైన నీదివ్యతేజంబునన్ జూచి, రారా నాముద్దు నరసింహాయంచున్,
దయాదృష్ఠివీక్షించి, నన్నేలు నాస్వామీ
నమస్తే సదా బ్రహ్మచారీ నమస్తే
వాయుపుత్రా నమస్తే
నమస్తే నమస్తే
నమస్తే నమస్తే నమస్తే నమః
ఆంజనేయ స్వామి కృప కొరకు తప్పక పఠించతగ్గ ఇతర భక్తి స్తుతులు హనుమాన్ చాలీసా మరియు ఆంజనేయ అష్టోత్రం.
Leave a Comment